Codigo Morse

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O codigo Morse ye un metodo utilizau en telecomunicacions pa codificar caracters de texto como secuencias standardizadas de dos duracions de sinyal diferents, clamadas puntos y rayetas (en anglés dots/dits y dashes/dahs)^[1]. O codigo Morse leva o nombre de Samuel Morse, l'inventor d'o telegrafo.

O Codigo Morse Internacional, tamién conoixiu como Codigo Morse Continental, codifica as 26 letras anglesas d'a A a la Z, cualques letras no anglesas, os numeros arabicos y un chicot conchunto de sinyals de puntuación y procedimientos. No i hai distinción entre letras mayusclas y minusclas. Cada simbolo de codigo Morse ye formau por una secuencia de puntos y rayetas. A duración d'o punto ye a unidat basica de medida de tiempo en a transmisión de codigo Morse. A duración d'una rayeta ye tres vegadas a duración d'un punto. Cada punto u rayeta dentro d'un caracter va seguiu d'un periodo d'ausencia de sinyal, clamau espacio, igual a la duración d'o punto. As letras d'una palabra son deseparadas por un espacio de duración igual a tres puntos, y as palabras son deseparadas por un espacio igual a siet puntos. Pa augmentar a eficiencia d'a codificación, se disenyó o codigo Morse de traza que a longaria de cada simbolo sía aproximadament inversa a la frecuencia d'aparición d'o caracter que representa en o texto de l'idioma anglés. Asinas, a letra mas comuna en anglés, a letra «E», tien o codigo mas curto: un solament punto. A causa que os elementos d'o codigo Morse s'especifican por proporción en cuenta de por duracions de tiempo especificas, o codigo cheneralment se transmite a la velocidat mas alta que o receptor ye capaz de decodificar. A taxa de transmisión d'o codigo Morse (velocidat) s'especifica en grupos por menuto, comunament denominaus palabras por menuto.^[2]

O codigo Morse cheneralment se transmite por meyo d'a codificación d'un meyo portador d'información, como corrient electrica, ondas de radio, luz visible u ondas sonoras. A corrient u onda ye present entre o periodo de tiempo d'o punto u rayeta y ye ausent entre o tiempo entre puntos y rayetas.

1. ↑ (en) F. J. Camm, Radio Engineer's Pocket Book, 2nd ed., Chemical Publishing Co., 1941, p. 72
2. ↑ (en) Headquarters, Department of the Army, TM 11-459, International Morse Code (Instructions), Washington, D.C.: U.S.G.P.O., 1968 pp. 7–8